Bashkimi Demokratik për Integrim (BDI), përmes një deklarate me shkrim thotë se ky subjekt politik angazhohet për zgjidhje sa më të shpejte të çështjes së emrit, pasi kjo është pengesa e vetme për zhbllokimin e proçeseve integruese të vendit .
“Është më se e qartë se bëhet fjalë për një problem biletaral në mes dy vendeve dhe ne këtë drejtim mbështesim negociatat që zhvillohen nën patronazhin e OKB-së, njëkohësisht, BDI konsideron se në zgjidhjen e kësaj çështje është më shumë se i dobishëm dhe i mirëseardhur inkuadrimi i Bashkimi Evropian (BE), SHBA-së dhe NATO-s, sepse duke marrë parasysh relevancën e këtyre institucioneve, ndërmjetësimi i tyre do të përshpejtoj arritjen e zgjidhjes të pranueshme për të dy palët” thuhet në deklaratën e BDI-së.
Sipas BDI-së, vendet anëtare të BE-së, NATO-s, por edhe vendet e rajonit duhet të kenë një qasje më aktive në zgjidhjen e problemeve dhe çështjeve të hapura në rajon , për shkak se, në këtë mënyrë do të japin kontributin e tyre në drejtim të hapjes e dyerve për anëtarësim në familjen e madhe evropiane të të gjitha vendeve të Ballkanit perëndimor, gjë që është parakusht për stabilitetin e rajonit.
