Mjeku turk, Yusuf Sonmez, thotë se po e shijon lirinë e tij në vilën luksoze që ka në qytetin Kartel të Turqisë.
Ai ka folur nga atje për gazetën serbe “Novosti”, duke thënë edhe njëherë se është krejtësisht i pafajshëm për akuzat që i bëhen.
“Është e vërtetë që në vitin 2008 shkurtazi kam qenë
në Kosovë, dhe kam punuar për klinikën private “Medicus”, afër Prishtinës.
Por, aty kam qenë vetëm kirurg dhe nuk kam marrë pjesë në asnjë trafikim organesh të njerëzve. Kurrë nuk e kam njohur Hashim Thaçin, dhe kurrë nuk kam bashkëpunuar me të, aq më tepër për punë jonjerëzore”, ka thënë Sonmez.
Sonmez ka folur për kohën e tij në Prishtinë, dhe nuk dëshiron të vijë më kurrë këtu.
“Është e vërtetë që i njoh njerëzit që gjenden në aktakuzë. Njëri prej tyre, Lutfi Dervishi, ka qenë shef i Medicusit. Ai është njeriu që më thirri në 2008n për të shkuar nga Stambolli në Kosovë për të kryer operacione. Kjo sepse shumë pacientë nga Kosova dhe Shqipëria vinin në Turqi për shkak të operacioneve, kështu që Dervishi e pati idenë që t’i bëjmë operacionet në Prishtinë. Tash nga kjo perspektivë, i bie shumë pishman që e pranova ftesën e tij. Shpresoj që këmba ime kurrë të mos shkelë më në Kosovë”, ka thënë Sonmez.
Ai u arrestua në Turqi dhe u lirua menjëherë, dhe është e vështirë që ekstradohet në Kosovë, apër t’u përballur me akuzat e mundshme të EULEX-it. /indeksonline
